A estrea miña foi en Rábade. Contei na biblioteca, onde había dúas sorpresas: un libro de contos breves de Luís Moure mariño editado por Caixa Galicia e que xa non se topa, e Marisena, unha profe moi atenta que xa ficera un traballo de recollida de tradición oral, moi, pero que moi interesante. Xa quedei con ela que cando o publicase eu mercaba a publicación.

No CEIP de Vilanova da Arousa eran mais pequenos e puidemos xogar con ditos de contar e descontar, con versos e estrear unha historia mariñeira. Orixinal dun mariñeiro chamado Rúa para unha das súas fillas, que ven escrita no libro "Os ausentes de Casteltón" de Jacobo Barros. Un conto contemporáneo que sen querelo actualiza e revitaliza o que se chama "tradición oral". Unha historia de perigo entre un anguiacho (ou congro)e unha lumbriganta. Alí estaba Pilar, a bedel, unha mina de historias e sucedidos da zona, das comidas, da pesca, dos jodechinchos. Hai que facela falar.

Hoxe estiven no Díaz Pardo de Culleredo. Coma nos anteriores, os espectadores fixeron sempre o final dos contos. O distintivo de hoxe foi que o segundo grupo era maiormente de mulleres co que a minoría masculina asumimos o feminino como denominación xenérica e tivemos un conto de amor que nos deixou a todas algo mais lixeiras.